İlham Əliyev Parisdə: "Biz də terrordan əziyyət çəkirik..."

“Noyabrın 13-də Parisdə baş verən faciəvi terror aktı ilə bağlı Azərbaycan xalqının Fransa xalqına başsağlığını çatdırmaq istəyirəm”.

Bu sözləri Azərbaycan prezidenti İlham Əliyev Parisdə UNESCO Baş Konfransının 38-ci sessiyasının Liderlər Forumunda çıxışı zamanı deyib.

Prezident bildirib ki, Azərbaycan Fransa xalqının acısını bölüşür və Fransa tarixinin bu faciəvi anında onların yanındadır: “Terror aktı göstərdi ki, beynəlxalq ictimaiyyət bu bəla ilə mübarizə aparmaq üçün səylərini birləşdirməlidir. Dünyada heç bir ölkə terror aktlarından sığorta olunmayıb. Ona görə də yalnız beynəlxalq ictimaiyyətin birləşmiş səyləri bizə bu bəla ilə mübarizədə yardım göstərə bilər. Azərbaycan keçmişdə müxtəlif terror aktlarından əziyyət çəkən ölkə kimi beynəlxalq terrora qarşı mübarizədə mühüm rol oynayır və bu rol beynəlxalq ictimaiyyət tərəfindən qiymətləndirilir”.