Bolqarıstan hava məkanını Rusiya üçün bağladı

Rusiya Fövqəladə Hallar Nazirliyi Bolqarıstan hakimiyyətinin öz hava məkanını bağladıqdan sonra, Suriyaya uçan humanitar yardım yüklü təyyarənin marşrutunu dəyişməli olub.

Oxu.Az xəbər verir ki, bu barədə “İnterfaks” Rusiya FHN-nin beynəlxalq fəaliyyət departamentinin direktor müavini Aleksandr Tomaşeva istinadən məlumat yayıb.

Tomaşevin qeyd etdiyi kimi, uçuşun marşrutu öncədən Sofiya ilə razılaşdırılmışdı, Bolqarıstan öz hava məkanını uçuşdan bir saat öncə bağlayıb.

“Ona görə də biz Rusiya Xarici İşlər Nazirliyi ilə bərabər təcili olaraq Bolqarıstandan yan keçərək yeni marşrut təşkil etməli olduq. Bu, yetərincə operativ şəkildə edilib və kiçik gecikmə ilə təyyarə Latakiyaya uçub”, - FHN nümayəndəsi bildirib.

Daha öncə Sofiya hakimiyyətinin FHN-nin İl-76 təyyarəsinə sifarişin müəyyən edildiyi müddətdə təqdim edilmədiyi üzündən uçuşa etiraz etdikləri bildirilmişdi.

Oktyabr ayının 16-da axşam saatlarında FHN-nin İl-76 təyyarəsi Latakiyaya 20 tondan çox humanitar yük çatdırıb.

Geri reysdə təyyarə Suriyadan 56 qaçqın, o cümlədən də 10 uşaq götürüb.

Bolqarıstan artıq öz hava məkanını humanitar yüklü Rusiya təyyarələrinin uçuşu üçün sentyabrın 8-də artıq bağlamışdı.