Birinci xanım 2 nəfəri "Qızıl çinar" mükafatı ilə təltif etdi – FOTO

Heydər Əliyevə və Heydər Əliyev Fonduna həsr olunan təntənəli mərasim keçirilib

Mayın 10-da Azərbaycan xalqının ümummilli lideri Heydər Əliyevin anadan olmasının 92-ci ildönümünə və Heydər Əliyev Fondunun yaradılmasının 11 illiyinə həsr olunan təntənəli mərasim keçirilib.

ANS PRESS-in məlumatına görə, tədbirdə Azərbaycan Respublikasının Prezidenti İlham Əliyev, xanımı Mehriban Əliyeva və ailə üzvləri iştirak ediblər.

Dövlətimizin başçısı mərasimdə nitq söylədi.

Sonra “Heydər Əliyev” mükafatının təqdimetmə mərasimi oldu.

Əvvəlcə Azərbaycanın xalq rəssamı Tahir Salahovun “Heydər Əliyev” mükafatı ilə təltif olunması haqqında Azərbaycan Prezidentinin Sərəncamı oxundu.

Prezident İlham Əliyev mükafatı Tahir Salahova təqdim etdi.

Sonra ulu öndər Heydər Əliyevin fəaliyyətinə həsr edilən videoçarx nümayiş etdirildi.

Daha sonra Heydər Əliyev Fondu tərəfindən təsis edilmiş “Qızıl çinar” beynəlxalq mükafatının 2015-ci il qalibləri elan olundu.

Azərbaycanın birinci xanımı Mehriban Əliyeva Heydər Əliyev Fondunun mədəniyyət sahəsində həyata keçirdiyi layihələrə dəstəyinə və Azərbaycan mədəniyyətinin təbliğində fəal iştirakına görə tanınmış incəsənət eksperti Erve Mikaelofa və qədim muğam irsinin qorunmasına, muğam ifaçılıq məktəbinin inkişafına, yeni ifaçılar nəslinin yetişdirilməsinə, Azərbaycan mədəniyyətinin inkişafına verdiyi töhfələrə görə xalq artisti, muğam sənətinin görkəmli nümayəndəsi Ağaxan Abdullayevə “Qızıl çinar” beynəlxalq mükafatlarını təqdim etdi.

Erve Mikaelof və Ağaxan Abdullayev çıxış edərək mükafata görə təşəkkürlərini bildirdilər.