Sumqayıtda 25 nömrəli marşrut xətti niyə bağlandı? – RƏSMİ AÇIQLAMA – VİDEO

Sumqayıtda daha bir marşrut xətti ləğv edilib.

Xeberle.com-un məlumatına görə, yanvarın 8-dən 25 nömrəli marşrut xəttinin fəaliyyəti dayandırılıb. Bu isə həmin marşrut avtobuslarının xidmətlərindən istifadə edən sərnişinlərin narahatlığına səbəb olub.
Sərnişinlər Xeberle.com-a bildiriblər ki, əvvəlcədən xəbərdarlıq edilmədən xəttin bağlanması insanların mənzil başına çatmasında problemlər yaradıb: "25 nömrəli avtobusun yolunun bir çox məktəblərdən keçməsi səbəbindən məktəblilər də yollarda qalıblar. Bundan başqa Sumqayıt Dəmiryolu vağzalına gedən avtobusların azlığı da gecə saatlarında problem yaradıb. Vağzaldan gün ərzində yüzlərlə insan istifadə edir. 25 nömrəli avtobusun bağlanması nəticəsində insanlar 10A nömrəli marşrutda sıxlıqla qarşılaşıblar.

Bəs görəsən 25 nömrəli marşrut xətti niyə bağlanıb?


Elə bu sualımıza cavab tapmaq üçün "Sumqayıt Nəqliyyat" MMC-nin direktoru Xannı Rüstəmovla əlaqə saxladıq. X.Rüstəmov bildirdi ki, Sumqayıtda nəqliyyat sistemi yenidən qurulur və 25 nömrəli avtobus xəttinin ləğv edilməsi də aparılan islahatlarla bağlıdır: "İctimai nəqliyyatda əvvəllər marşrut xətləri sahibkarlar tərəfindən müəyyən edilirdi. Bu səbəbdən də marşrut xətti sahibkarların istəyinə uyğun olaraq formalaşdırılırdı. Bildiyiniz kimi, Sumqayıt şəhərində Nəqliyyat İdarəsi yaradılıb. Nəqliyyat sisteminin təkmilləşdirilməsi, yeni marşrut xətlərinin yaradılması və sistemli şəkildə işləməsi üçün bir çox iş görülür. Bununla əlaqədar bəzi marşrut xətləri təxirə salınıb, bəziləri ləğv edilib, bir qismi isə digərləri ilə əvəzlənib. Hazırda müəyyən problemlərə görə Sumqayıt şəhər Dəmiryolu vağzalı ərazisinə marşrut avtobusları daxil ola bilmir. Bu məsələ diqqətimizdədir və gələcəkdə insanların ora rahat gedib gəlməsi üçün işlər görüləcək”. Xannı Rüstəmov onu da qeyd edib ki, 25 nömrəli avtobus mikrorayonların daxili ilə hərəkət edirdi bu isə qaydalara uyğun deyil. Sərnişinlər digər alternativ marşrutlardan istifadə edə bilərlər. Vağzal ərazisinə getmək istəyənlər 10A və 39 nömrəli marşrut avtobuslarının xidmətlərindən yararlanaraq mənzil başına çata bilərlər.