Azərbaycanda Qafqazın ilk mühərrik və sənaye yağları zavodu açıldı – FOTO

Bu günə qədər Azərbaycana mühərrik yağları ancaq ixrac edilib. Artıq bundan sonra ölkə tələbatını 100% qarşılamaq imkanına malik yeni müəssisə fəaliyyətə başlayacaq.

Şirkət dünyanın ən aparıcı markalarının istehsal etdiyi mühərrik və sənaye yağlarından heç də geri qalmayan məhsul istehsal edəcək. Söhbət xarici bazara “Made in Azerbaijan” brendi altında məhsul ixrac etməyi də hədəfləyən “Technol” mühərrik və sənaye yağları zavodundan gedir.

Şirkət rəsmi açılışla yanvarın 28-də ictimaiyyət və mediyaya elan edilib. Açılış mərasimində şirkətin rəhbərləri, “Technol”un partnyorları, avtomobil ekspertləri, marketoloqlar və qeyd etdiyimiz kimi media nümayəndələri iştirak ediblər.

“Technol” şirkətinin İcraçı direktoru Murad Rəfiyev jurnalistlərə deyib ki, şirkət Azərbaycanın, həmçinin Qafqazın ilk mühərrik yağları istehsal edən zavodudur:

“Technol” Azərbaycanın, həmçinin Qafqazın ilk böyük və modern mühərrik və sənaye yağları istehsal edən zavodudur. Hazırda zavodda 60-dan çox çeşiddə; minik, yük avtomobilləri, motosiklet, avtomat və mexanik ötürücü qutular üçün transmissiya yağları və sənaye dəzgahları üçün yağlar istehsal edilir.

Şirkət hazırda Sumqayıt ərazisində yerləşir. 50-yə yaxın əməkdaşımızın çalışdığı zavodda hazırda gündəlik 100 ton məhsul istehsal edilir və ümumilikdə “Technol”un gündəlik 200 tona yaxın məhsul istehsal etmək qabiliyyəti var. Hazırda hədəfimiz illik 80 min tona yaxın məhsul istehsal etməkdir”.

M.Rəfiyev bildirib ki, məhsulların xarici bazara çıxarılması istiqamətində danışıqlar və bazar araşdırmaları gedir və yaxın 3 ay ərzində “Made in Azerbaijan” brendi altında məhsullar xaricə satılacaq:

“Azərbaycan bazarına çıxdıqdan sonra paralel olaraq ixracatla bağlı planlarımızı həyata keçirəcəyik. Öncə məhsullarımızı qonşu ölkələrə - Rusiya, İran, Türkiyə, Gürcüstana, daha sonra Mərkəzi Asiya və keçmiş Sovet ölkələrinə ixrac etməyi hədəfləmişik.

Daha sonra isə məhsullarımızı Avropa və Afrika ölkələrinə ixrac ediləcək. Həmçinin qeyd edim ki, “Technol” mühərrik yağlarının istehsalında istifadə olunan xammala Avropanın aparıcı avtomobil mühərriki istehsalçıları olan “Ford”, “Peugeot Citroen”, “Volkswagen”, BMW, “Mercedes Benz”, Porsche”, “Opel”, “Renault”, “General Motors”, “Volvo”, “İveco”, “Man” və s. şirkətlər təsdiq verib”.

Onun sözlərinə görə, məhsulların çeşidi laboratoriyada analiz olunur və onların sayı gündən-günə artırılır.

M.Rəfiyev qeyd edib ki, zavodun tikintisi yüzdə yüz özəldir və tikintidə hər hansı bir kredit xəttindən istifadə edilməyib:

“İnvestisiya 100-də 100 özəl səhmdara məxsusdur. Hazırda xarici səhmdarların cəlbi, əlavə kredit xəttindən istifadə edilməsi kimi planlarımız yoxdur. Gələcəkdə belə bir düşüncəmiz olacaqsa, bu barədə ictimaiyyət öncədən məlumatlandırılacaq”.

İcraçı direktor qeyd edib ki, məhsulun yerli istehsal olması onun qiymətinin də aşağı olmasına səbəb olacaq:

“Bizim üçün önəmli cəhət budur ki, məhsul yerli istehsal olduğuna görə, onun qiyməti də heç şübhəsiz aşağı olacaq. Təxminən 50%-ə yaxın aşağı qiymətdən söhbət gedir. Məhsullar bazara çıxarıldıqdan sonra, qiymət daha da endiriləcək. Bazar araşdırmaları özünün müsbət tərəfini göstərəc”.

O, bildirib ki, məhsulun qiymətinin aşağı olması ilə yanaşı, keyfiyyətinə də təminat veriləcək:

“Zavodun labarotoriyası 2015-ci ilin son avadanlıqları ilə təchiz edilib. Avadanlıqlar isə İngiltərə, Almaniya və Yaponiyadan alınıb. Bu isə bizə imkan verir ki, həmin məhsulların keyfiyyətini yoxlayaq və bazar daha yüksək keyfiyyətli məhsul çıxarda bilək”.

M.Rəfiyev bir daha vurğulayıb ki, istehsalatda istifadə edilən xammal və qatqılar dünyanın ən aparıcı şirkətlərinə məxsusdur və buna görə də onların keyfiyyətinə əmindirlər.

M.Rəfiyev zavodun ölkəyə valyuta axınını da təmin edəcəyini qeyd edib:

“Hazırda Azərbaycan mühərrik yağlarının 100%-ni xaricdən alır. Təbii ki, şirkətin məhsulları qeyd etdiyim kimi xarici bazar çıxdıqdan sonra, ölkəyə valyuta axını təmin etmiş olacaq”.

“Zavodun tikintisinə 2015-cü ildən başlanılıb. Artıq son bir ayda isə işlərə yekun vurulub. İstehsalatda test period bitib. Artıq fevralın 1-dən bütün avtomobil istifadəçiləri bizim mühərrik yağlarını istənilən mağazalardan əldə edə biləcəklər”, - deyə şirkətin rəsmisi sözlərinə əlavə edib.

İqtisadiyyat Nazirliyi sənaye şöbəsinin müdiri Murad Abdullayev zavodun açılış mərasimində deyib ki, bu gün biz dövlət tərəfindən göstərilən qayğının nəticəsini “Technol”un timsalında görürük:

“Bu gün artıq Azərbaycanda daha bir istehsal sahəsi açılıb və bazar yeni məhsul istehsal edən müəssisə daxil olub. Yeni iş yerləri açılıb və məşğulluq təmin edilib. Bu sevindirici haldır”.

Nazirliyin rəsmisi vurğulayıb ki, “Technol” şirkəti Azərbaycan prezidentinin sərəncamı ilə yaradılmış “İnvestisiyanın Təşviqi Sənəd”indən yararlanıb:

“”İnvestisiyanın Təşviqi Sənəd”ini əldə etmiş şirkət ölkəyə idxal etdikləri avadanlıqlar üçün ƏDV və gömrük rüsumlarından azad edilir.

Sözsüz ki, bu güzəştlərdən yararlanmaq artıq rəqabətqabiliyyətli yeni məhsulların istehsalına şərait yaradacaq.

Bununla da, onların istehsal etdikləri məhsullar həm daxili, həmdə xarici bazarda inamla realizə olunacaq”, - deyə nazirliyin rəsmisi sözlərinə əlavə edib.

Tədbirdə çıxış edən şirkətin rəsmi siması DJ Tural Yusifov isə çıxışında qeyd edib ki, özü tezliklə ictimaiyyətə açıq şəkildə məsulun testini edəcək və video hərkəsə açıq yayımlanacaq:

“Bundan başqa biz müəssisədə olub yağın istehsal prosesini əks etdirən videomateriallar da hazırlayacağıq ki, istehlakçılar hər şeyi şəffaf şəkildə müşahidə edə bilsinlər”.