Ərdoğan Avropa Parlamentinin rəhbərinə: Sən kimsən axı?

Türkiyənin Avropa İttifaqına (Aİ) üzv olma məsələsi referenduma çıxarıla bilər.

Oxu.Az-ın məlumatına görə, bunu Türkiyə prezidenti Rəcəb Tayyip Ərdoğana bəyan edib.

“Qərb deyir ki, biz ölüm hökmünü tətbiq edə bilmərik. Lakin bu xalqın taleyi sizin əlinizdə deyil. Artıq 53 ildir ki, Türkiyəni Aİ-nin qapısında saxlayıblar. Sən, Avropa Parlamentinin rəhbəri, kimsən axı? Siz öz parlamentinizi terror təşkilatlarından təmizləyin, sonra danışarıq. Siz ekstremistlərə kömək edirsiniz, sonra isə Türkiyəni Aİ ilə hədələyirsiniz. Siz gecikmisiniz, gəlin indi hər şeyi həll edək. İlin sonuna qədər gözləyək, sonra yekun qərarın qəbul olunması üçün Türkiyə xalqına müraciət edək”, - Ərdoğan Ankarada çıxışı zamanı deyib.

Türkiyə lideri əlavə bildirib ki, əgər ölkə parlamenti ölüm hökmünün tətbiq edilməsi barədə qərar qəbul etsə, o bu qərarı dəstəkləyəcək. Ərdoğan əlavə edib ki, bu məsələ referenduma da çıxarıla bilər.

Qeyd edək ki, noyabrın 9-da Avropa Komissiyasınnı (AK) yaydığı bəyanatda rəsmi Ankarın vətəndaş cəmiyyəti, insan haqları və söz azadlığı sahələrində apardığı siyasət tənqid olunub. Bəyanatda həmçinin Türkiyə qanunvericiliyinin Aİ normalarına uyğun olmadığını qeyd edilib.

Avropa Parlamentinin rəhbəri Martin Şults ötən şənbə Türkiyəni müxalifət və jurnalistlərə qarşı siyasəti ilə əlaqədar iqtisadi sanksiyalarla hədələyib.