Biznesmenlərə İrandan təklif

Azərbaycanlı iş adamlarını Ramsər şəhərində turizm sektoruna, kənd təsərrüfatına, gülçülük və dekorativ bəzək bitkilərinin əkilməsi və ixrac edilməsi sahəsinə sərmayə yatırmağa dəvət edirik. Trend-in məlumatına görə, bu sözləri İranda səfərdə olan Azərbaycan jurnalistlərinə Mazandaran əyalətinin Ramsər şəhər meri Hüseyn Süruri deyib.

H.Süruri deyib ki, Azərbaycan və İranı çox qədim mədəni və tarixi köklər bağlayır və bu bağlılıq iki ölkə arasındakı əlaqələrdə müstəsna rol oynaya bilər. "Biz Ramsər şəhərinə sərmayə yatıran iş adamlarına hər cür şərait yaratmağa hazırıq. Onlara torpaq sahəsinin ayrılması və sərmayə qoyuluşunun sığortalanmasını təmin edə bilərik. Ölkədə xarici investisiyaların sığortalanması haqqında qanun var və bu qanun xarici investorlara zəmanət verir".

H.Süruri azərbaycanlı investorlar üçün Ramsərdə gəmiçilik və dəniz limanına sərmayə yatırılmasında şəraitin yaradılmasına hazır olduğunu vurğulayıb. “Hazırda Ramsərdə istehsal olunan sitrus meyvələri dünya ölkələri ilə yanaşı, Azərbaycanda da ixrac olunur. Bu əlaqələri genişləndirmək üçün yaxşı imkanlar var və biz Azərbaycan iş adamlarını buraya dəvət edirik".