Bakıda ikinci əl avtomobillər sürətlə bahalaşır

Azərbaycanda ikinci əl avtomobil bazarı təşviş içindədir. Belə ki, hazırda ikinci əl avtomobil bazarında alıcı tapılmır.

Amma buna baxmayaraq avtomobillər sürətlə bahalaşır. Avtomobil bazarında durğunluq elan saytlarında da hiss olunur.

Oxu.Az xəbər verir ki, Alsat.az saytının rəhbəri Vaqif Hüseynov Fins.az-a bildirib ki, oktyabr ayının 15-dən etibarən avtomobillərin internet üzərindən satışları da demək olar ki dayanıb.

İkinci əl avtomobillər 20-30% bahalaşdı

Sentyabrda ikinci əl avtomobil satışlarında nisbi canlanma yaranmışdı. Dolların bahalaşması yenidən vəziyyəti dəyişib. V.Hüseynov bildirir ki, oktyabr ayının ortalarına kimi bir həftədə 1200-1500 avtomobil elanı yerləşdirilirdi. Onun 90%-i ikinci əl avtomobil modelləri ilə bağlı olurdu.

Bir həftədə 200-300 avtomobil satılırdı. İndi bu rəqəm cəmi 5-10 avtomobilə qədər düşüb. Buna baxmayaraq, avtomobillər 20-30% civarında bahalaşıb. Ekspert bildirir ki, adi qaydada satışlar artdığı zaman avtomobillərin qiymətində bahalaşma müşahidə edilir.

1,70 manata kimi bahalaşan dollar qiymətləri artırır

Bu dəfə isə dolların 1,70 manata qədər bahalaşması qiymət artımına səbəb olub. Onun sözlərinə görə, adətən belə vəziyyətlərdə heç kim avtomobil almağa tələsmir və alıcılar gözləmə mövqeyində qalırlar. V.Hüseynov hesab edir ki, avtomobillərin satış qiymətlərinin artımı isə təbiidir.

Məsələn, sentyabrda 10 min manatlıq avtomobil 6 min dollar idisə, eyni avtomobili müştəri indi satdığı halda bu məbləğ 4 min dollar təşkil edəcək. Belə olan halda isə satışı itirmiş olur. Ekpert bildirir ki, ikinci əl avtomobillərin böyük hissəsi dollarla satılır. Avtomobili manatla satıb həmin pula dollarla satılan avtomobil almaq istəyən müştəri də qiyməti artırmalı olur.

10 min manatlıq avtomobili 11-12 min manata kimi bahalaşdırırlar

V.Hüseynov deyir ki, nəticədə elanla avtomobil satanlar sürətlə qiymətləri yeniləməyə başlayıblar. Əgər əvvəl bir həftədə 1200-1500 avtomobil elanı yerləşdirilirdisə, indi yeni elanların əvəzində həmin müştərilər avtomobillərin qiymətlərini dəyişirlər.

Məsələn, bir neçə ay əvvəl yerləşdirilən satılmayan avtomobillərin qiymətləri yenilənir. Əvvəl 10 min manata satışa çıxarılan avtomobilin qiyməti yenilənərək 11-12 min manat edilir.

Bu avtomobilləri hələ də alırlar

Ekpert bildirir ki, hazırda satılan avtomobillər qiyməti 10 min manata kimi 1998-2000-ci illərə aid “Mercedes”, “Opel” modelləri, 2006-2013-cü illərə aid “KİA” və “Hyundai” modelləridir.

Belə ki, yerli avtomobil alıcıları köhnə “Mercedes” və “Opel”lər qiymət baxımından daha məqsədəuyğun hesab edir. Ekonom klass “Kia Rio”, “Kia Cerato”, “Hyundai Accent” modellərini isə daha çox taksi kimi sürmək üçün alırlar.

Durğunluq dekabrda da davam edəcək

Ekpert hesab edir ki, ilin sonuna kimi dolların 2 manata kimi bahalaşması gözləntisi hələ uzun müddət avtomobil bazarında durğunluğun davam edəcəyindən xəbər verir.

Onun sözlərinə görə, yerli iqtisadi səbəblərlə yanaşı, FED-in uçot dərəcəsini qaldıracağı ilə bağlı gözləntilər bunun deməyə əsas verir:

“Avro dollar qarşısında möhkəmlənə bilmirsə, manatın möhkəmlənə biləcəyi hazırda ağla batan deyil”. Belə olan halda isə heç kim avtomobil almağa maraq göstərməyəcək.