Xarici bankların nümayəndəlikləri yeni qaydada hesabat verəcək

Mərkəzi Bankın İdarə Heyəti “Xarici bankın yerli nümayəndəliyinin hesabatının forması, məzmunu və təqdim edilməsi Qaydası”nı təsdiq edib.

AzNews.info APA-ya istinadən xəbər verir ki, bununla əlaqədar Mərkəzi Bankının İdarə Heyətinin 28.06.2004-cü il tarixli qərarı ilə təsdiq edilmiş “Xarici bankın yerli nümayəndəliyinin hesabatının forması, məzmunu və Mərkəzi Banka təqdim edilməsi Qaydası” ləğv olunub.

Yeni qayda fevraldan qüvvəyə minib. Nümayəndəlik idarə edilməsi qaydasını və cari fəaliyyətini əks etdirən illik hesabat tərtib edir və hesabat dövründən sonrakı ilin iyun ayının 1-dən gec olmayaraq təqdim edir.

Hesabat dövrü yanvar ayının 1-dən dekabr ayının 31-i də daxil olmaqla olan dövr sayılır. İl ərzində yeni yaradılan nümayəndəlik üçün birinci hesabat dövrü onun dövlət qeydiyyatına alındığı tarixdən dekabr ayının 31-i də daxil olmaqla olan dövr sayılır. Hesabat nümayəndəliyin rəhbəri tərəfindən imzalanmış və möhürlə təsdiq edilmiş kağız daşıyıcıda və ya elektron imza ilə təsdiq edilmiş elektron sənəd formasında Mərkəzi Banka təqdim edilir.

Hesabatda hesabat ili ərzində təsisçi bankdan və onun filiallarından banklararası kredit və ya depozit almış, habelə onlara kredit və ya depozit vermiş yerli banklar, təsisçi banka qarşı yerləşdiyi ölkənin bank tənzimləməsi və nəzarəti orqanının cinayət yolu ilə əldə edilmiş pul vəsaitlərinin leqallaşdırılmasına və terrorçuluğun maliyyələşdirilməsinə qarşı fəaliyyət üzrə tətbiq edilən nəzarət tədbirləri barədə məlumat və ya heç bir nəzarət tədbiri tətbiq olunmadığı halda bu barədə qeyd, nümayəndəliyin idarə edilməsi və fəaliyyəti, nümayəndəliyin işçilərinin sayı və əgər rəhbərliyin tərkibində dəyişikliklər varsa, bunun səbəbləri haqqında məlumat əksini tapmalıdır.

Xarici valyutada pul axınları manatın xarici valyutaya nisbətdə hesabatın tərtib edilməsi gününə olan rəsmi məzənnə ilə manat ekvivalentində göstərilməlidir.

Hesabatda nümayəndəliyin yerli və xarici banklarda olan bank hesabları üzrə pul axını(mln. manatla), il ərzində hesab üzrə məxaric olunmuş vəsaitlər, təsisçi bankın kənar auditor yoxlamasından keçmiş illik maliyyə hesabatı və Azərbaycan dilinə tərcüməsi notariat qaydasında təsdiq edilmiş auditor rəyinin surətləri, təsisçi bank tərəfindən nümayəndəlikdə aparılan yoxlamanın nəticələrini əks etdirən sənədlər barədə məlumatlar da verilməlidir.