Dövlət büdcəsini icrasına nəzarət gücləndirilir

Azərbaycan Hesablama Palatası və İqtisadiyyat Nazirliyi arasında Razılaşma Memorandumu imzalanıb.

Bu barədə Platadan Oxu.Az-a bildirilib.

“Memorandum dövlət büdcəsinin və büdcədənkənar dövlət fondlarının büdcələrinin gəlir və xərclərinin icrasına dövlət və ictimai nəzarətin gücləndirilməsi, dövlət vəsaitlərinin qənaətli, səmərəli və nəticəli istifadəsinin təmin edilməsinə töhfə verilməsi, məlumat bazasının genişləndirilməsi, məlumatların əldə olunmasında operativliyin təmin olunması və alternativ informasiya mənbəyinin yaradılması məqsədilə imzalanıb”, - deyə Palatadan qeyd edilib.

Hesablama Palatasının 2015-2017-ci illər üzrə Strateji İnkişaf Planı çərçivəsində imzalanmış bu memorandum qanunvericiliklə Palata ilə Nazirliyə həvalə edilmiş funksiyaların yerinə yetirilməsi zamanı fəaliyyətin koordinasiyasını təşkil etməklə vəzifələrin səmərəli şəkildə icrası istiqamətində əməkdaşlığı təmin edəcək.