Corc Kluniyə yeni mükafat veriləcək

Hollivud aktyoru, rejissor, ssenarist və prodüser Corc Kluni "Qızıl Qlobus" mükafatının xüsusi heykəlciyini alacaq.

ANS PRESS-in məlumatına görə, söhbət hər il "Qızıl Qlobus" mükafatının təqdimetmə mərasimi zamanı təqdim olunan Sesil DeMill adına xüsusi mükafatdan gedir. Həmin mükafat əyləncə dünyasına xüsusi töhfələr verən şou-biznes nümayəndələrinə təqdim olunur.

Mükafatı təqdim edən Xarici Mətbuat Assosiasiyasının açıqlamasına görə, Corc Kluni "kameranın hər iki tərəfində" gördüyü işlərə görə Sesil DeMill mükafatına layiq görüləcək. Corc Kluni öz heykəlciyini 2015-ci il yanvarın 11-də "Qızıl Qlobus" mükafatının növbəti təqdimetmə mərasimində qovuşa biləcək.

Bundan əvvəl həmin mükafata Vudi Allen, Codi Foster, Robert de Niro, Stiven Spilberq və Robin Uilyams kimi məşhurlar layiq görülmüşdü.