Mehriban Xanlarova "Adam içində"nin canlı yayımında özündən çıxdı və...

Əməkdar artist Mehriban Xanlarova "Adam içində"nin verilişində birbaşa yayımda əsəbiləşərək efiri tərk etdi.

ANS PRESS-in məlumatına görə, verilişdə müzakirə zamanı ekspertlər arasında fikir ayrılığı yaranıb. Həyat yoldaşını itirmiş və iki uşağı ilə birlikdə hazırda küçədə qalmış hamilə qadın ətrafında gedən müzakirələr mübahisəyə çevrilib.

Əməkdar artist Mehriban Xanlarovanın qadına dəstək çıxması digər ekspert - hüquqşünas Tahir Əlirzayevin xoşuna gəlməyib. O, aktrisaya üz tutaraq ihtehza ilə "professor Mehriban Xanlarova" deyə müraciət edib. Onun bu ifadəsi aktrisanın özündən çıxarıb və o, ayağa qalxaraq efirdən çıxıb.

Aparıcı Elgiz Əkbər reklam fasiləsindən sonra studiyanı tərk etməyən Mehriban Xanlarovadan verilişə qayıtmasını istəyib.

"Mən bəzən əsəblərimə hakim ola bilmirəm. Tahir müəllimə artıq söz demək istəmədiyim üçün efirdən çıxdım. Bu vaxtadək onunla heç bir problemim olmayıb. Amma onun fikirləri ilə razı deyiləm və həmin qadına qarşı haqsızlıq hesab edirəm."-deyən aktrisa, ekspert yerinə qayıdıb.