Lənkəran Dövlət Dram Teatrı cənub bölgəsinin mədəni-maarif müəssisələrinə hamilik köməyinə start verib

AzNews.info xəbər verir ki, Lənkəran Dövlət Dram Teatrının yaradıcı kollektivi cənub bölgəsinin rayonlarında fəaliyyət göstərən mədəniyyət müəssisələrinə hamilik köməyinə start verib. Teatr bu səpkidə ilk görüşünü Cəlilabad rayonunda mədəniyyət işçilərinin iştirakı ilə keçirilən tədbirdə reallaşdırıb. Teatrın direktoru Tofiq Heydərov çıxış edərək, son bir il ərzində əldə olunmuş nailiyyətlərdən, eləcə də kollektivin gələcək yaradıcılıq planlarından ətraflı söz açıb. Bildirilib ki, Lənkəran teatrı cari ilin yanvar ayında qonşu İran İslam Respublikasında keçirilən Beynəlxalq Fəcr Teatr Festivalında uğurlu çıxışına görə festivalın təsis etdiyi mükafata layiq görülüb. Teatrın cari ilin aprel ayının 4 və 5-də Bakıda Gənc Tamaşaçılar Teatrının səhnəsində hesabat xarakterli çıxışı da ölkənin tanınmış sənət adamları, eləcə də paytaxt ictimaiyyəti tərəfindən yüksək dəyərləndirilib. Teatr son bir ay ərzində Əli Əmirlini “Köhnə ev” və daha bir neçə uşaq əsərini tamaşaçıların ixtiyarına verib. Əməkdar incəsənət xadimi, tanınmış rejissor Bəhram Osmanovun quruluşunda Əli Vəlioğlunun “Əsrlərin harayı” tamaşasının premyerası isə iyunun 27-i üçün nəzərdə tutulub.

Tədbirdə teatrın direktoru Tofiq Heydərov teatrın hamilik köməyindən də bəhs edib. O, bildirib ki, professional teatrların mədəniyyət müəssisələrinə hər cür yardım etməsi məsələsi həmçinin Mədəniyyət və Turizm Nazirliyi, şəxsən cənab nazir Əbülfəs Qarayev tərəfindən bir vəzifə olaraq onların qarşısında qoyulmuşdur. “Biz bölgədə fəaliyyət göstərən dram kollektivlərinə, xalq teatrlarına baza kimi baxırıq”,-deyə Tofiq Heydərov vurğulayıb. – “Bizim teatrda istedadlı aktyorlara böyük tələbat vardır. Məmnunuyyətlə sizin istedadlılarınızın da bacarığından yararlanmağa, onları tamaşalarımıza cəlb etməyə hazırıq”. Mədəniyyət müəssisələrinə hamilik köməyi layihəsinə keçən ildən start verildiyini diqqətə çatdıran direktor birinci olaraq belə köməkliyin Lənkəran rayonunun mədəniyyət müəssisələrinə tətbiq edildiyini və bunun yaxşı da nəticə verdiyini söyləyib: “Mədəniyyət və klub müəssisələri istənilən tədbirin gerçəkləşməsində bizə etibar edir, məsləhətlərimizdən yararlanırlar. Biz həmçinin müxtəlif dekorların hazırlanmasında, paltar və əlbisələrlə təmin olunmasında onlardan köməyimizi əsirgəmirik”.

T.Heydərov çıxışı zamanı onu da bildirib ki, yaradıcı kollektiv bundan sonra hamilik köməyini bölgə səviyyəsində davam etdirməyi qarşısına məqsəd qoyub: ”Mədəniyyət müəssisələrində konsert-tamaşa proqramlarının hazırlanmasında hər hansı köməkliyin göstərilməsinə hazırıq. Təki bizə müraciət edin, çalışacağıq ki, istənilən vaxt yanınızda olaq”.

Direktorun fikri Cəlilabad rayonunun mədəniyyət işçiləri tərəfindən razılıqla qarşılanıb. Cəlilabad Rayon Mədəniyyət və Turizm Şöbəsinin müdiri Rəşad Salmanov çıxışında Lənkəran teatrının hamilik təşəbbüsünü alqışladığını bəyan edib. O, həvəskar mədəniyyət kollektivlərinin professional sənət adamlarının məsləhətinə, tövsiyəsinə həmişə ehtiyac duyduqlarını xüsusi qeyd edib və Lənkəran teatrı ilə əlaqələrinin daha sıx və möhkəm olmasından ötrü lazım olan səylərin görüləcəyini bəyan edib.