Qardabanidə gömrük işçisi rüşvətə görə saxlanıldı

Gürcüstan DİN-nin Antikorrupsiya agentliyinin əməkdaşları Maliyyə Nazirliyinin Gəlirlər Xidmətinin Qardabanidəki keçid məntəqəsinin Şota B. adlı zabit-gömrük işçisini saxlayıblar.

Oxu.Az “Qruziya-onlayn”a istinadla xəbər verir ki, saxlanılan şəxs böyük məbləğdə rüşvət almaqda ittiham olunur.

İstintaqın versiyasına əsasən, saxlanılan şəxs M.M. adlı vətəndaşdan 10 min dollar tələb edib və alıb. Bu məbləği o, xidməti vəzifəsindən istifadə edərək kommersiya xarakterli məlumatı əldə etmək və ötürmək üçün tələb edib.

Hazırda Gürcüstanın cinayət məcələsinin müvafiq maddəsi üzrə istintaq aparılır. Bu maddə 7 ildən 10 ilə qədər azadlıqdan məhrumetməni nəzərdə tutur.