Öldürülmüş bank işçisinin anası: “Onlar pul gücünə nə desən edər...”

Kredit üstündə törədilmiş cinayət yaxın qohumları düşmənə çevirib. Öldürülmüş bank işçisinin anası qətli törətməkdə ittiham olunanlara verilən həbs cəzası ilə razılaşmır.

“KredAqro” bank olmayan kredit təşkilatının Bərdə filialında kredit mütəxəssisi vəzifəsində çalışmış və 2013-cü ildə yaxın qohumu tərəfindən qətlə yetirilmiş Anar Ələkbərovun anası Şövkət Ələkbərova virtualaz.org saytına müraciət ünvanlayıb.

Ş.Ələkbərova bildirib ki, oğlu Anar Ələkbərov Tərtər Hərbi Məhkəməsində baş məsləhətçi işləmiş Tural Şəfiyev və onun tanışı Adil Bəbişov tərəfindən xüsusi amansızlıqla və əvvəlcədən planlaşdırılmış şəkildə qətlə yetirilib: “Tural yaxın qohumunun adına götürdüyü krediti vaxtında ödəməyib. Anar isə pulun vaxtında ödənilməməsinə irad bildirib. Nəticədə Tural və onun Adil adlı tanışı Anarı qəsdən və planlaşdırılmış şəkildə öldürüblər”.

Ş.Ələkbərovanın sözlərinə görə, Tural krediti vaxtında ödəməməklə Anarın işində problem yaradıb: “Anar Bakıda fəaliyyət göstərən bankların birində işə düzəlmək istəyirdi. Buna görə imtahan vermişdi. İmtahandan keçəndən sonra işdən çıxmaq üçün ərizə vermişdi. Lakin Turalın krediti ödəməməsi problem yaratdı. Anar isə krediti vaxtında ödəməyini istəyirdi.

Turalla Anar uşaqlıq dostu olmayıb. Lakin biz qohumuq, mərhum həyat yoldaşımın Turalın atası və əmisi ilə yaxşı münasibəti olub. Buna görə də Anar qohumlar arasında problem yaratmamaq üçün məsələ ilə bağlı Turalın əmisinə və digər qohumlarına müraciət edib. Turalın əmisi problemi həll edəcəyinə söz verib. Hadisə baş verəndən sonra isə tamamilə iftira və yalan məlumatlar yayırlar. Hətta pul gücünə hər şey edə biləcəklərini, Turalı həbsdən azad etdirəcəklərini deyirlər. Anar yaxın qohumlarının adına kredit götürərək Turalla bölməyib”.

Ana deyir ki, Tural qətli əvvəlcədən planlaşdırıb: “2013-cü il, iyulun 2-də Anarın əmisi Niyazi Turalın əmisi Məhərrəmlə görüşərək ona Turalın kredit borcunu ödəmədiyi, bu səbəbdən da Anarın işlədiyi bankda rəhbərliklə problemi yarandığını bildirmişdi. Elə həmin gün Tural Anarı öz maşını ilə Hüseynbəyli kəndinin yaxınlığından keçən Qarabağ kanalının kənarına aparıb. Əgər onun öldürmək planı olmayıbsa, niyə başqa əraziyə yox, məhz öz kəndlərinin yaxınlığına, səssiz yerə, kanalın yanına aparırdı?

Orada əvvəlcədən tanıdığı atasının sürücüsü Adil Bəbişovla birləşərək oğlumu amansızcasına qətlə yetirib və meyiti həmin su kanalına atıb. Anarın cəsədi Qarabağ kanalından iki gündən sonra çıxarılıb. Həkim-ekspertlər müəyyən ediblər ki, oğlum ağır zərbələr alaraq qansızma nəticəsində ölüb. İlkin istintaqda Tural Şəfiyev və Adil Bəbişov özləri törətdikləri cinayəti etiraf etmiş və birinin beşbarmaqla, digərinin isə yumruqla Anara zərbə yetirməklə öldürdüklərini bildirmişdirlər”.

Nəhayət, iki ildən sonra Gəncə Ağır Cinayətlər Məhkəməsinin qərarı ilə Tural Şəfiyev 14 il, Adil Bəbişov isə 13 il 6 ay müddətinə azadlıqdan məhrum ediliblər. Zərərçəkənlər isə qərardan apelyasiya şikayəti veriblər. Onlar cinayətkarlara daha ağır cəza tələb edir.