ÇL: "Qarabağ" "Roma"ya minimal hesabla uduzdu

“Roma” ilə “Qarabağ”ın "Olimpiko" stadionundakı qarşılaşması meydan sahiblərinin 1:0 hesablı qələbəsi ilə yekunlaşıb.

Bu qələbə sayəsində "Roma" xallarını 11-ə çatdıraraq, qrup lideri kimi Çempionlar Liqasında 1/8 finala yüksəlib. İtaliya təmsilçisi ilə eyni xala malik, lakin şəxsi oyunlarda uduzan İngiltərənin "Çelsi" klubu isə eyni vəsiqəni qrup ikincisi kimi əldə edib. 7 xalı olan İspaniya "Atletiko"su 3-cü yeri tutduğu üçün mübarizəni Avropa Liqasının 1/16 final mərhələsində davam etdirəcək. Hələ ötən turdan qrupda qalacağı dəqiqləşən "Qarabağ" isə C qrupunda 2 xalla kifayətlənib.