TQDK bu gün imtahan keçirir

Tələbə Qəbulu üzrə Dövlət Komissiyası (TQDK) bu gün rus bölməsi abituriyentləri üçün Azərbaycan dili fənnindən imtahan keçirir.

Komissiyadan Oxu.Az-a verilən məlumata görə, imtahanlar Bakı, Naxçıvan, Gəncə, Sumqayıt, Şəki, Ağcabədi, Göyçay, Şirvan, Lənkəran və Xaçmaz şəhərlərində keçirilir.

Abituriyentlərə Azərbaycan dili fənnindən 30 test tapşırığı təqdim edilir. Səhv cavablar düzgün cavabların nəticəsinə təsir göstərmir. İmtahanının nəticəsi “məqbul” və ya “qeyri-məqbul”la qiymətləndirilir, “məqbul” alanlar qəbul imtahanlarına buraxılırlar. Abituriyentin “məqbul” alması üçün onun topladığı bal 15-dən az olmamalıdır. Qeyd edək ki, hər düzgün cavab bir balla qiymətləndirilir.

İmtahanda 8426 abituriyentin iştirak edəcəyi nəzərdə tutulur. Bugünkü imtahanda “qeyri-məqbul” qiyməti alan, həmçinin müxtəlif səbəblər üzündən imtahanda iştirak etməyən abituriyentlər iyulun 7-də keçiriləcək növbəti Azərbaycan dili imtahanında iştirak edə bilərlər.