Atletlər kəndində qolf simulyatoru quraşdırıldı – FOTO

Azərbaycan Qolf Federasiyası qolfun populyarlaşdırılması, ölkədə qolf oynamaq üçün yaradılan şərait barədə geniş təbliğatın aparılması istiqamətində fəaliyyətini davam etdirir.

AQF-dən Oxu.Az-a verilən məlumata görə, bu məqsədlə Federasiya Bakıda keçirilən ilk Avropa Oyunlarında iştirak etmək üçün ölkəmizə təşrif buyurmuş idmançıların qaldığı Atletlər kəndində xüsusi qolf simulyatoru quraşdırıb.

Bu simulyatorun sayəsində dünyada real mövcud olan 130-dan çox qolf sahəsində virtual qolf oynamaq mümkündür.

Beləliklə də, idmançılar və komandaların nümayəndələri üçün asudə vaxtlarında qolf oynamaq imkanı yaradılıb.

Bundan başqa idmançılar qolf və bu idman növünün ölkəmizdə inkişafına dair ətraflı məlumat alırlar.

Gün ərzində qolf simulyatorundan istifadə edənlərin əksəriyyəti son illərdə idmanın Azərbaycanda sürətlə inkişaf edən bu əyləncəli növünə aludə olduqlarını söyləyirlər.

Qeyd etmək lazımdır ki, qolf uzun çəkən fasilədən sonra yenidən Yay Olimpiya Oyunlarının idman oyunları növləri sırasına daxil edilib və 2016-cı ildə Rio Olimpiadasında qolf üzrə də medallar oynanılacaq.