Bakının mərkəzində yanğın olub – FOTO (YENİLƏNİB)

FHN Bakıda baş verən yanğınla bağlı məlumat yayıb.

Oxu.Az-ın Fövqəladə Hallar Nazirliyinin (FHN) saytına istinadən verdiyi xəbərə görə, Bakı şəhəri, Səbail rayonunda vətəndaşa məxsus ümumi sahəsi 2150 kv.m olan “MƏRKƏZİ” kafenin vestibülünün tavanı 72 kv.m sahədə yanıb.

Yanğın zamanı kafenin ikinci mərtəbəsində yerləşən Bristol mehmanxanasına məxsus 4 ədəd kondisioner yüksək temperaturdan deformasiyaya uğrayıb.

Mehmanxanada olan 3 nəfər əcnəbi vətəndaş yanğınsöndürənlər tərəfindən təhlükəsiz əraziyə təxliyyə olunub. Kafenin qalan hissəsi, bitişik digər kafe və ikinci mərtəbədə yerləşən mehmanxana yanğından mühafizə olunub.

10.06.2015

Bu gün axşam saatlarında Bakının mərkəzində, Səbayil rayonu Məmməd Əmin Rəsulzadə küçəsində yaşayış binasında yanğın baş verib.

Hadisə şahidlərinin Oxu.Az-a verdikləri məlumata görə, yanğın keçmiş “Azərbaycan” kinoteatrı ilə üzbəüz yerləşən binanın ikinci mərtəbəsində baş verib.

Hadisə yerinə yanğınsöndürənlər cəlb ediliblər.

Alovun ram edilməsi istiqamətində işlər aparılır.