700 bal yığan abituriyent: Əziyyət çəkməmişəm

Mayın 20-də ali təhsil müəssisələrinin I və IV ixtisas qrupları üzrə keçirilmiş qəbul imtahanlarının nəticələri açıqlanıb.

IV ixtisas qrupu üzrə yalnız bir nəfər maksimum nəticə göstərərək 700 bal toplayıb. Həmin şəxs Fiziki, Riyaziyyat və İnformatika Təmayüllü Liseyin məzunu Rəna Əliyevadır.

Vunderkinq öz təəssüratlarını Oxu.Az-la bölüşüb:

“Mən Əliyeva Rəna Məmmədağa qızı Fizika, Riyaziyyat və İnformatika Təmayüllü Liseyin məzunuyam. Universitetə də “Hədəf kursları”nın iştirakı ilə hazırlaşmışam.

İmtahana girməmişdən öncə özümə inamım var idi və inanırdım ki, 700 bal yığacam. Sınaq imtahanlarında da hər zaman yüksək nəticələr göstərirdim. Bu baxımdan, özümə güvənirdim. Amma imtahan nəticələri açıqlananda gözlərimə inana bilmədim.

700 bal yığdığımı biləndə çox qəribə hisslər keçirdim. Respublikada IV qrup üzrə ancaq mənim maksimum bal yığmağım özümə inandırıcı gəlmirdi.

Bu uğuru qazanmağımda müəllimlərimin əziyyəti əvəzedilməzdir”.

R.Əliyeva bildirib ki, 700 bal yığmaq üçün gününü ancaq kitablara həsr etməyib:

“Bu uğuru əldə etmək üçün o qədər də əziyyət çəkməmişəm. Deyirlər ki, maksimum bal yığanlar bütün günü kitab oxuyur. Bunlar boş söhbətdir. Gün ərzində yeddi saat kitab oxumaq mənə bəs edirdi”.

Abituriyent bölüşdüyü təəssüratında ixtisas seçiminin Azərbaycan Dövlət Tibb Universitetinin müalicə işi üzrə fakültəsinin olacağını qeyd edib:

“Həkim olmaq istəyirəm. Həkim olub ilk olaraq ölkədəki səhiyyə sisteminə düzəliş etmək istəyirəm. Amma təhsilimi Almaniyada davam etdirəcəyəm”.