Bakı səmasındakı toz-duman nə vaxt çəkiləcək?

Bakıda və Abşeron yarımadasında müşahidə olunan toz dumanının miqdarının sanitar normadan artıq olması səbəbi açıqlanıb.

Ekologiya və Təbii Sərvətlər Nazirliyindən (ETSN) virtualaz.org-a verilən məlumata görə, Nazirliyin Ətraf Mühit üzrə Milli Monitorinq Departamentinin mütəxəssislərinin 29 mart 2018-ci il tarixində səhər saatlarında apardığı monitorinqlərin nəticələrinə əsasən, Bakıda və Abşeron yarımadasında müşahidə olunan toz dumanının miqdarının sanitar normadan artıq olduğu müəyyənləşib.

Buna səbəb ölkə ərazisinə Ərəbistan yarımadasından atmosfer axınları ilə zəif toz dumanının daxil olmasıdır.

Havanın keyfiyyətini ölçən avtomatik və stasionar monitorinq stansiyalarından alınan məlumata görə, 30 mart 2018-ci il tarixində ölkə ərazisinə daxil olan şimal-qərb küləyi ilə əlaqədar olaraq Bakı və Abşeron yarımadasında günorta saatlarından etibarən havada tozun miqdarının azalacağı, sanitar norma daxilində olacağı proqnozlaşdırılır.