Azərbaycanda ödənişsiz təhsil yoxdur

Təhsil haqları ilə bağlı bir məsələni qeyd edə bilərəm ki, universitetlərdə 2010-cu ildən etibarən Azərbaycanda yeni ali təhsil sistemində adambaşına maliyyələşdirmə prinsipinə keçirilməsinə başlanılıb və 2014-cü ildə həmin proses başa çatıb.

Bəzən insanlar ödənişli təhsil, ödənişsiz təhsil deyirlər. Bugünkü gün ödənişsiz təhsil yoxdur. Təhsilin hamısı ödənişlidir, sadəcə olaraq onların bir hissəsi - dövlət sifarişi ilə yüksək nəticələr əldə edən tələbələrin ödənişi dövlət tərəfindən tənzimlənir.

Oxu.Az xəbər verir ki, bu sözləri Təhsil nazirinin müavini Ceyhun Bayramov jurnalistlərə bildirib.

“Dövlət tərəfindən ödənilən təhsil haqları, o qiymətlərlə tənzimlənir. Bu qiymətlər də hökumətin müvafiq qərarına əsasən ixtisas, ali təhsil müəssisələrindən asılı olaraq formalaşır. Bu ödənişi tələbə, onun ailəsi hiss etmir. Bunu dövlət ödəyir. Digər öz vəsaitləri hesabına ödənilən tələbələrin ödəniş haqlarına gəldikdə isə bugünkü gün mövcud praktika ondan ibarətdir ki, həmin təhsil haqları ali təhsil müəssisələri tərəfindən formalaşdırılır. Və burada dövlətin hər hansı tənzimlənmə mexanizmi bugünkü gün mövcud deyil” - deyə, nazir müavini qeyd edib.

Bayramov həmçinin özəl universitetlərə təhsil haqlarının endirilməsi ilə bağlı yalnız tövsiyə edə biləcəyini və qiymətlərə qarışmaq kimi səlahiyyəti olmadığını bildirib:

“Burada olan məsələ əsasən rəqabət əsasında, tələb-təklif əsasında formalaşır. Təhsil Nazirliyi olaraq ali təhsil müəssisələrinə tövsiyə edirik ki, tələbələrə daha geniş təhsil imkanları yaratmaqları baxımından təhsil haqqları yüksək olmasın.

Tövsiyə edirik ki, ödənişli əsasla təhsil aparan ali təhsil müəssisələri dövlət tərəfindən tənzimlənən haqlardan yüksək haqq müəyyən etməsinlər. Ancaq Nazirlik olaraq biz bunu tövsiyə xarakterli edə bilərik. Biz bunu tələb edə bilmərik. Bununla belə, hesab edirəm ki, əgər hər hansı təşəbbüs varsa ona baxılacaq”.