Rusiyadan ABŞ-a ETİRAZ

Rəsmi Moskva Vaşinqtona etiraz notası verib.

AzNews.info Report-a istinadən xəbər verir ki, məlumatı Rusiya Xarici İşlər Nazirliyinin mətbuat xidməti yayıb.

XİN-in ABŞ-ın Moskvadakı səfirliyinin müşavir-elçisinə təqdim etdiyi etiraz notası ABŞ-ın Rusiyanın Vaşinqtondakı ticarət nümayəndəliyində axtarışlar aparılması planları ilə əlaqədardır.

"Sentyabrın 2-də ABŞ-ın Moskvadakı səfirliyinin müşavir-elçisi E.Qodfri Rusiya Xarici İşlər Nazirliyinə çağırılıb. Ona Birləşmiş Ştatlar hökumətinin Rusiya Federasiyasının Vaşinqtondakı ticarət nümayəndəliyində axtarışlar təşkil etmək niyyəti ilə bağlı etiraz notası təqdim olunub. ABŞ bu gündən bizə binaya girişi qadağan edir, hərçənd bina Rusiyanın dövlət mülkiyyətindədir və diplomatik immunitetə malikdir", - deyə Rusiya XİN-in bəyanatında vurğulanıb.

XİN-in bəyanatında bildirilib ki, müşavir-elçiyə verilən notada planlaşdırılan axtarışlar misilsiz, aqressiv aksiya kimi qiymətləndirilib.

Rusiya XİN həmçinin Moskvanın cavab tədbirləri hüququnu özündə saxladığını qeyd edib.