Ərdoğan qiyamda öldürülən vətəndaşın dəfnində ağlayıb – VİDEO+FOTO

Türkiyə prezidenti Rəcəb Tayyib Ərdoğan hərbi qiyam zamanı öldürülən Erol Olçakın və onun oğlunun cənazə mərasimində ağlayıb.

AzNews.info xəbər verir ki, ANS PRESS-in məlumatına görə, “Aret” agentliyinin sahibi olan Erol Olçak Ərdoğana yaxınlığı ilə seçilib.

Olçak hərbi qiyama etiraz etmək məqsədi ilə getdiyi Boğaziçi körpüsünün üzərində vurulub.
53 yaşlı Erol Olçakla bərabər oğlu 16 yaşlı Abdullah Olçok da həmin hadisələr zamanı öldürülüb. Onlarla vida mərasimi Mərmərə Univeristetində baş tutub.

Bu gün Türkiyədə hərbi çevrilişə cəhd nəticəsində həlak olanlar vətəndaşların dəfn mərasimi keçirilib. İstanbul şəhərin yerləşən Fatih məscidində 7 şəhidin cənazə namazı qılınıb. Şəhidlərin son mənzilə yola salınması mərasimi Ankarada və digər şəhərlərdə də təşkil edilib.

Türkiyə prezidenti Rəcəb Tayyib Ərdoğan, Türkiyənin 11-ci prezidenti Abdullah Gül, Türkiyə Böyük Milli Məclisinin sədri İsmail Kahraman, sabiq baş nazir Əhməd Davudoğlu cənazə namazının qılınmasında iştirak ediblər.

Şəhidlərin üzəri Türkiyə bayrağı ilə örtülmüş cənazələri onların doğulduqları vilayət və şəhərlərə aparılaraq torpağa tapşırılır.

Qeyd edək ki, iyulun 15-də Türkiyədə hərbi çevrilişə cəhd olub. Hadisə nəticəsində ümumilikdə 265 nəfər həlak olub.

Onlardan 161 nəfəri hərbi çevrilişə cəhdin qarşısı alınarkən həlak olub, ölənlərdən 104-ü isə qiyamçı hərbçidir, 1400-dən çox yaralı var.