Biləsuvarda generallar Elçin Quliyev və Qasım Rezayi arasında danışıqlar – YENİLƏNİB

Azərbaycanın Dövlət Sərhəd Xidmətinin (DSX) rəisi general-polkovnik Elçin Quliyevin və İranın Sərhəd Qoşunlarının komandanı general-mayor Qasım Rzayinin rəhbərliyi altında nümayəndə heyət­lərinin işçi görüşü keçirilib.

DSX-nin Mətbuat Mərkəzinin məlumatına görə, iki ölkənin generalları İranın Biləsuvar şə­hə­rində biraraya gəlib.

Tərəflər 2018-ci ilin dekabrın 11-də Bakı şəhərində Azərbaycan və İran sərhəd qurumları rəhbərlərinin görüşü zamanı əldə olunan razılaşmaların icra­sını nəzərdən keçirib, sərhəd təhlükəsizliyinin təminatı məsələləri, dövlət sər­hə­dindən bu­ra­xılış məntəqələrində şəxslər, nəqliyyat vasitələri və yüklər üzərin­də etibarlı sərhəd nəzarətinin təşkil edilməsi, transsərhəd cinayətkarlığın təza­hürləri, o cüm­lədən narkotik vasitələrin qeyri-qanuni dövriyyəsi, qaçaqmalçılıq, beynəl­xalq terrorçuluq, qeyri-leqal miqrasiya və digər təhdidlərlə mübarizə sa­hə­sində sər­­həd mühafizə orqanları qarşısında duran tapşırıqlara dair fikir müba­diləsi aparıb, qarşılıqlı əlaqələndirmənin və əməkdaşlığın daha da inkişaf etdirilməsinin zəru­ri­­li­yini vurğulayıblar.



Azərbaycan və İran iştirak etdiyi beynəlxalq əhəmiyyətli nəqliyyat layihələri çərçivəsində sərhəd infrastruk­turu­nun təkmilləşdirilməsi, sərhəd nəzarəti prosedurlarının sürətləndirilməsi məq­sə­dilə həyata keçirilən tədbirlər nəticəsində “Astara” və “Biləsuvar” dövlət sərhə­dindən buraxılış məntəqələrinin 24 saatlıq iş rejiminə keçirilməsinin əhəmiyyəti vurğulanıb. Bununla yanaşı “Astara dəmir yolu” dövlət sərhədindən buraxılış məntəqəsinin tam həcmdə fəaliyyət göstərməsi, Astara çayı üzərindən yeni avtomobil körpüsünün və piyada keçidinin tikintisi üzrə işlərin aparılması üçün hər iki tərəfdən zəruri tədbirlərin görülməsinin vacibliyi qeyd olunub.

Görüşdə sərhəd mühafizəsi sahəsində məlumat mübadiləsinin aparılması, birgə tədbirlərin təşkili və maraq kəsb edən məsələlər üzrə əməkdaşlığın inkişaf etdiril­məsi məqsədilə bilavasitə dövlət sərhədində və dövlət sərhədindən bura­xılış məntəqələrində görüşlərin davam etdirilməsi barədə razılıq əldə edilib.

* * *15:40

İran-Azərbaycan sərhədindəki təhlükəsizlik davamlı xarakter daşıyır. İki qonşu və dost ölkənin sərhədçilərinin səmərəli əməkdaşlığı nəticəsində sərhəddə təhlükəsizlik təmin edilib.

AzərTAc xəbər verir ki, bu sözləri Ərdəbilə səfər edərək Azərbaycan ilə İran arasındakı sərhəd-mühafizə məntəqələrinə baxış keçirən sərhəd qoşunları komandanı general Qasım Rezayi deyib.



General bildirib ki, İran Azərbaycan ilə 756 kilometrlik quru və su sərhədinə malikdir. Qarşılıqlı əməkdaşlıq nəticəsində problemlər aradan qaldırılıb və sərhədlərin birgə mühafizəsi həyata keçirilir. İki ölkənin sərhədçiləri arasındakı yaxın münasibətlər narkotik vasitələrin qaçaqmalçılığının, qanunsuz miqrasiyanın və terrorun qarşısını almağa yaxşı imkan yaradıb.

Q. Rezayi deyib ki, bu gün İranın Azərbaycanla olan sərhədi ən təhlükəsiz bölgədir.