Azərbaycan Müdafiə Nazirliyi David Tonoyanı təkzib etdi: "Bu məsul şəxs..." DAVID TONOYANDAN SENSASİON BƏYANAT

Azərbaycan Müdafiə Nazirliyi Ermənistanın müdafiə nazirinin səlahiyyətlərini icra edən David Tonoyanın iki ölkə müdafiə nazirlikləri arasında birbaşa rabitə əlaqəsinin qurulması barədə sensasion bəyanatına cavab verib.

Müdafiə Nazirliyindən bu barədə virtualaz.org-a bildiriblər: " Azərbaycan Müdafiə Nazirliyi ilə Ermənistan müdafiə nazirliyi arasında rabitə və ya heç bir digər əlaqə mövcud deyil. Düşənbədəki danışıqlara əsasən cəbhədəki vəziyyətlə bağlı Ermənistanla qarşılıqlı əlaqəni yaradan şəxs müəyyən edilib və bu məsul şəxs Müdafiə Nazirliyinin əməkdaşı deyil".

* * *16:19

Ermənistan müdafiə naziri David Tonoyan bu gün sensasion bəyanatla çıxış edib. Virtualaz.org “Sputnik Armenia” agentliyinə istinadən xəbər verir ki, Tonoyan Azərbaycan və Ermənistan müdafiə nazirlikləri arasında birbaşa telefon əlaqəsinin yaradıldığını açıqlayıb.

“Ermənistan Müdafiə Nazirliyi Azərbaycan tərəfi ilə birbaşa telefon rabitəsi saxlayır”-David Tonoyan parlamentdə bildirib.



O qeyd edir ki, təmas xəttində gərginlik Düşənbədə baş nazir Nikol Paşinyanla Azərbaycan prezidenti İlham Əliyev arasında görüşdən sonra azalıb.

“İndi iki ölkənin müdafiə nazirlikləri arasında birbaşa telefon rabitəsi var. Biz qoşnların hərəkətini, mühəndis işlərini, hansısa başqa hərəkəti qeydə alan kimi Azərbaycan tərəfinə xəbər veririk ki, dayansınlar”-Tonoyan deyib.

“Bəs Azərbaycan tərəfi buna necə reaksiya verir?”-deputatlar müdafiə nazirindən soruşublar.

“Çox konstruktiv reaksiya verir”-Tonoyan cavab verib.



Müdafiə naziri dəqiqləşdirib ki, birbaşa telefon rabitəsi nazirlər səviyyəsində qurulmayıb. Lakin müvafiq vəzifəli şəxslər var və onlar məlumatları çatdırır. Rabitə ikitərəfli rejimdə fəaliyyət göstərir.

“Azərbaycan Müdafiə Nazirliyi də bizimlə əlaqə saxlayır. Şəxsən mənimlə yox, amma nazirliklə-bəli. Yenə də konstruktiv şəkildə”-o bildirib. Tonoyan əlavə edib ki, Paşinyanla Əliyev arasında birbaşa telefon rabitəsi hələ mövcud deyil.

Xatırladaq ki, Azərbaycan prezidenti ilə onun rabitə əlaqəsinin qurulduğu haqda bu günlərdə Nikol Paşinyan bildirmişdi. Paşinyan deyib ki, lazım olan məqamda informasiya yarım saat ərzində Azərbaycan prezidentinə və ya ona çatdırılır. Lakin Paşinyan rabitə kanalının hansı struktur üzərindən qurulduğunu deməmişdi.