İtkin düşmüş alpinistlərin whatsapp-dan çıxmasına münasibət

Metbuat.az-ın məlumatına görə, bunu itkin düşən alpinistlərdən olan Baburun yaxın dostu, tanınmış aparıcı Cəlalə Nəzəroğlu “Facebook” statusunda qeyd edib. Onun sözlərinə görə, itkin alpinistlərin hər üçünün aprelin 25-də “Whatsapp” qrupundan çıxdığı görülüb.

Bununla bağlı olaraq, AzNews.info-nun təsisçisi, eyni zamanda AzeGroup SMM şirkətinin rəhbəri Orxan Səfərli ilə, əlaqə saxlayaraq fikrini öyrənmək istədik. Orxan Səfərlinin sözlərinə görə, bunun texniki bir məsələ olmağı mümkündür. Belə ki, whatsapp uzun müddət istifadə edilmədikdə, daha sonra yenidən aktiv olunduqda yalnız son 30 günün mesajları istifadəçiyə çatır. Əgər whatsapp istifadəçisi 6 aya yaxın proqramdan istifadə etmədikdə, whatsappda daxil olduğu bütün qruplardan avtomatik olaraq silinə bilər. Lakin, deyilən 6 ay müddəti serverdən asıl olaraq dəyişə bilər. Kimdəsə bu müddət daha az, kimdəsə daha çox ola bilər. Oxşar problemlər, eyni whatsappın bir müddət sonra başqa telefonda aktiv olunması zamanı da yaşana bilər.

Hər bir halda ümid edirik ki, bu bir texniki məsələ deyil, və yaxın zamanlarda alpinistlər haqqında alacağımız xoş xəbərə bir müjdədir.