Azərbaycanda ilk ödənişli yol yayda istifadəyə veriləcək

Ələt-Astara-İran İslam Respublikası ilə dövlət sərhədi avtomobil yolunun inşası işləri bu ilin yay aylarında yekunlaşacaq. Bu barədə Azərbaycan Avtomobil Yolları Dövlət Agentliyinin mətbuat xidmətinin rəhbəri Anar Nəcəfli deyib.

Qurum rəsmisi bildirib ki, artıq həmin yolun böyük hissəsində işlər tam yekunlaşıb: "İran sərhədinə qədər uzanacaq yolun kənarlarında maneələrin qarşısını almaq məqsədilə çəpərlənmə işləri də aparılıb. Hazırkı Ələt-Astara yoluna paralel olaraq çəkilən yeni yol məsafəni də xeyli azaldacaq. Yeni yolun pullu olması nəzərdə tutulur".

A.Nəcəfli bildirib ki, tikinti işləri sürətlə davam etdirilir: "Artıq yolun böyük hissəsində işlər tam yekunlaşıb. Bir neçə hissə üzrə inşa olunan yolun 30 kilometrlik Şorsulu-Cəlilabad hissəsində son tamamlama işləri aparılır. Ümumilikdə yolun iyul-avqust aylarında istifadəyə verilməsi nəzərdə tutulub".

O əlavə edib ki, ümumi uzunluğu 204 kilometr olan yol 2 gediş və 2 gəliş zolağından ibarət olacaq: "Yol boyu hər hansı maneənin çıxmasının qarşısını almaq məqsədilə çəpərləmə işləri aparılıb. Bu məqsədlə yolun 55 əsas kənd və qəsəbədən keçən hissəsində körpü və birləşmələr inşa edilib".

Qeyd edək ki, hazırda mövcud olan Ələt-Astara-İran İslam Respublikası ilə dövlət sərhədi avtomobil yolunun ümumi uzunluğu 243 km təşkil edir. Avtomobil yolları dövlət agentliyi tərəfindən tikintisi aparılan yeni yol istifadəyə verildikdə isə bu məsafə 39 kilometr azalaraq 204 km-ə düşəcək.