Dünya indi Çini “ucuz” hesab etmir

Çinin “dünyanın fabriki” olduğu fikri artıq aktuallığını itirib.

Report xəbər verir ki, Böyük Britaniyanın “IHS Markit” araşdırma şirkətinin illik hesabatına əsasən, Çinin ucuz resursların cəlb olunduğu ölkə kimi qəbul edənlərin sayı ilk dəfə 2016-cı ilin yekununa görə 50%-dən aşağı olub.

“İHS Markit”in analitiki Pol Robinsonun fikrincə, bu, 2012-ci ildəki 70%-lik həddən olduqca aşağıdır.

Uzun müddətdir dünyanın hər tərəfindən şirkətlər ucuz işçi qüvvəsindən istifadə etmək üçün istehsalatını Çinə daşıyıb. Amma son illərdə Çinin özəl sektorunda əmək haqqı artıb və bununla da bazar cazibliyini itirməyə başlayıb.

Beynəlxalq Əmək Təşkilatının hesabatına görə, 2006-cı ildən etibarən Çində orta aylıq əmək haqqı 2 dəfədən çox artıb. 2014-cü ilin yekununa əsasən, Çində orta aylıq nominal əmək haqqı 685 ABŞ dolları olduğu halda, Vyetnamda bu 212 dollar, Filippində 216, Tailandda isə 408 dollar olub.

P.Robinsonun fikrincə, indi şirkətlər Çindən ucuz resursların olduğu ölkə kimi deyil, qlobal ticarət qovşağı kimi istifadə etməyə üstünlük verir.