Qızıl və qiymətli daşların rüsumlarında yenilik

Gələn aydan qüvvəyə minəcək qaydalara əsasən, fiziki şəxs ayda 1 dəfə 20 qram qızılı və bərkidilmiş 0,5 karat almazı gömrük ödənişləri vermədən Azərbaycana gətirə bilər.

Fiziki şəxslər Azərbaycana qiymətli metallar və qiymətli daşları yeni qaydalarla gətirəcək.

Oxu.Az xəbər verir ki, Nazirlər Kabinetinin “Fiziki şəxslər tərəfindən istehsal, yaxud kommersiya məqsədləri üçün nəzərdə tutulmayan malların gömrük sərhədindən keçirilməsinin güzəştli və sadələşdirilmiş qaydaları”nda dəyişikliklər edilməsi barədə qərar verib.

İndiyə qədər 1500 ABŞ dolları ekvivalentindən artıq qiymətli metallar və qiymətli daşlar fiziki şəxslər tərəfindən Azərbaycanın gömrük sərhədindən keçirilərkən yazılı formada bəyan edilməli idi. Dəyişikliyə əsasən, bu sahədə qiymətləndirmə ilə bağlı 1500 ABŞ dolları ekvivalenti ləğv edilib.

Başqa sözlə, əsasən, hər təqvim ayı ərzində bir dəfə 18 yaşına çatmış hər bir fiziki şəxs tərəfindən şəxsi istifadə üçün gömrük ərazisinə gətirilən 20 qram qızıl, ondan hazırlanmış zərgərlik və digər məişət məmulatları, emal olunmuş, çeşidlənmiş, çərçivəyə salınmış və bərkidilmiş 0,5 karat almaz güzəştli qaydada (gömrük ödənişlərini ödəmədən) gömrük sərhədindən keçirilə biləcək.

Bu hədlərdən artıq qiymətli metallar və qiymətli daşlar isə Azərbaycanın gömrük sərhədindən keçirilərkən yazılı formada bəyan edilməlidir.

Bu qayda 30 gün sonra qüvvəyə minəcək.