Bu şəkilləri kompyüterinizə yükləməyin – VİDEO

Texnologiya inkişaf etdikcə, onlara qarşı bədniyyətli hücumlar da çeşidlənir. Son zamanlarda aşkar olunan təhlükələrdən biri də məhz şəkillər vasitəsilə kompüterlərin virusa yoluxdurulmasıdır. Doğrudur, kompüter istifadəçiləri bir çox hallarda antivirus proqramlarına arxayın olaraq, internet şəbəkəsi vasitəsilə yayılan təhlükələri ciddiyə almır. Söhbət açdığımız viruslar isə əsasən elektron-poçt ünvanları və sosial şəbəkələr vasitəsilə yayılır. Bu cür təhlükələrin artıq ölkəmizdə də yayıldığını nəzərə alan Elektron Təhlükəsizlik Mərkəzi kompüter istifadəçilərini xəbərdar edib.

ETM-in baş məsləhətçisi Aysel Hadıyeva ANS-ə bildirdi ki, hakkerlər şəkillərin pikselləeinə zərərverici kod yerləşdirir və istifadəçilərə göndərirlər.

Ziyanverici proqramı şəklin pikselində gizlətmək, onu e-poçt əlavələrində, pdf və ya başqa formatlarda saxlamaqdan daha əlverişlidir. Həmin şəkilləri qəbul edən istifadəçi proqramı kompüterə endirmiş olur və beləcə zərərverici kod fəaliyyətə başlayır. Həmin proqram əsasən kompüterin arxa fonunda işləyir və istifadəçinin bütün məlumatlarını qarşı tərəfə ötürür. İstifadəçi isə bundan yalnız kompüteri sıradan çıxanda xəbər tutur. Bədniyyətli hakerlər zərərverici kodu yerləşdirmək üçün əsasən mənzərə və heyvan şəkillərindən istifadə edir. Çünki bu cür şəkillər daha çox diqqəti cəlb edir və daha az şübhə doğurur.

Aysel Hadıyevanın sözlərinə görə, buna səbəb isə kiməsə zərər vurmaq və ya gəlir əldə etməl ola bilər.

Kompüterinizin bu cür virusa yoluxmaması üçün ETM sizə naməlum e-poçt ünvanlarından gələn və ya sosial şəbəkələrdə paylaşılan, sizə göndərilən hər şəkil formatında olan faylları açmamağınızı, eləcə də kompüterinizə yükləməməyi tövsiyə edir.