Bakının məşhur “aeroport sumkası” Avropada 3200 manata satılır – FOTO

Hər birimizin “aeroport sumkası”, “yük sumkası” kimi tanıdığmız çantalar bu ilin dəbinə çevrilib.

Oxu.Az ATV.az saytına istinadən xəbər verir ki, məşhur “Balenciaga” markası 2016-cı il kolleksiyasına “aeroport” çantasına bənzər çanta modelləri əlavə edib. Onların qiyməti təxminən 3 min 200 manatdır.

Futbolçu Pavel Poqrebnyakın həyat yoldaşı Mariya Moskva restoranlarından birində bu çanta ilə görünüb.

Məsələni maraqlı edən odur ki, 3 min 200 manat dəyəri olan bu çantalar bazarlarda 1-2 manata satılır.

Mövzu ilə bağlı açıqlama verən modelyer Elnarə Bəkirova bildirdi ki, bu çantalar keçən ildən dəbdədir və olduqca böyük marağa səbəb olub:

“Məşhur brend markasının istehsal etdiyi həmin çantalar bizim nənə-babalarımızın bazara gedərkən apardıqları çantalara bənzəyir. Sadəcə, onların materialında fərq var. Belə ki, bu çantalar brenddir və brend olduğu, adını brendləşdirdiyi üçün yüksək qiymətə satılır.

Bu gün dünyada onlara böyük maraq var. Hətta onu almaq üçün növbədə durub gözləyən insanlar mövcuddur. Onun materialı, ona sərf olunan saplar, eləcə də üzərində istifadə olunan rənglər tərkibinə görə tam fərqlidir.

Dünyada bu çantalar qəbul olunsa da, bizdə olduqca marağa səbəb olub. Çünki, bizim bazarlarda bu çantalara rast gəlmək olur. Avropadakı dəbi daim izləyirik. İnanmıram ki, onlar bizim aeroportda satılan çantadan xəbərdar olsunlar”.