Türkiyə terrorçulardan qorunmaq üçün sərhəddə divar tikdi

Türkiyə Suriya ilə sərhəddə 700 kilometrlik divarın tikintisini yekunlaşdırıb.

Oxu.Az-ın Hürriyet Daily News-a istinadən xəbərinə görə, bu barədə cümə axşamı, iyunun 15-də, Türkiyənin müdafiə naziri Fikri İşıq deyib.

Divar Türkiyə ərazisinə İŞİD və PKK terror təşkilatlarının yaraqlılarının keçidinin qarşısını almaq üçün ucaldılıb.

Nazirin sözlərinə görə, Türkiyə-Suriya sərhədində işıqlandırma sistemi, müşahidə kameraları və sensorlar quraşdırılacaq.

Bundan əlavə, təhlükəsizliyi təmin etmək üçün dronlardan istifadə olunacaq.

Fikri İşıq əlavə edib ki, oxşar divarın tikintisinə İranla sərhəddə də başlanılıb.