Dövlət Komitəsindən layihələndirmə təşkilatlarına – XƏBƏRDARLIQ

Dövlət Şəhərsalma və Arxitektura Komitəsi tərəfindən bu ilin 30-31 mart tarixlərində Bakı, Sumqayıt şəhəri və Abşeron rayonlarının icra hakimiyyətlərinə icrası məcburi olan əsaslandırılmış göstəriş ünvanlanıb.

Komitədən Oxu.Az-a verilən məlumata görə, həmin göstərişə əsasən, binaların yol verilən hündürlük həddi və mərtəbələrin sayı, ərazinin tikinti və tikinti sıxlığı əmsalına dair şəhərsalma normalarını pozan, inşasına yeni başlanan tikintilər üzrə tədbir görülməsi və bu barədə komitənin məlumatlandırılması tapşırılıb.

Eyni zamanda həmin tikintiləri layihələndirən layihələndirmə təşkilatlarına xəbərdarlıq edilib ki, şəhərsalma normalarının pozulması üzrə analoji xətaların təkrarlandığı təqdirdə layihələndirmə işlərinə dair lisenziyaları dayandırılacaq.