“Fitch” Azərbaycanın bank sektorunun problemlərindən danışdı

Yüksək dollarlaşmadan əziyyət çəkən Azərbaycanın bank sektoru milli valyutanın devalvasiyasından ciddi zərər görüb.

AzNews.info “İnterfaks-Azərbaycan”a istinadən xəbər verir ki, bu barədə “Fitch” Beynəlxalq reytinq agentliyinin “Dollarisation in CIS/Georgian Banking Sectors” adlı hesabatında deyilir.

“MDB ölkələrinin yüksək dollarlaşma balansı olan banklar milli valyutanın devalvasiyasından ciddi zərər görüb. Lakin daha çox zərərlə Azərbaycan və Ukraynanın bank sektoru üzləşib.

Çünki bu ölkələrin bankları lazımi normativ dəstəyi ala bilmədi. Qazaxıstan, Rusiya, Gürcüstan və Belarusun bank sektoru dövlətdən daha çox dəstək gördü. Məzənnə dəyişiklikləri gürcü və erməni banklarına o qədər də ciddi təsir etməyib”, - icmalda qeyd edilib.

Agentliyin qiymətləndirməsinə görə, regionda fəal şəkildə xarici valyutada kredit götürülür və depozit cəlb edilir.

“Ermənistan, Gürcüstan və Belarus bankları xarici valyutada ən yüksək kredit payına sahibdirlər (57%-66%), bununla yanaşı Azərbaycan, Gürcüstan, Qazaxıstan və Belarus bankları xarici valyutada ən yüksək (60%-dən çox) depozitə malikdirlər”, - agentlik qeyd edir.

Xarici valyutada pərakəndə kreditləşmə Azərbaycan, Ukryana, Gürcüstan və Ermənistan üçün mühüm əhəmiyyət kəsb edir.

“Regionda əsasən xammalın ucuz qiymətləri ucbatından yaranan iqtisadi böhran banklarda kapitallaşma problemləri yaradıb. Kapitala daha çox təzyiq Azərbaycan, Ukrayna və Qazaxıstan bank sektorunda müşahidə edilir”, - icmalda vurğulanır.